ទឹក ពិតជាមានតួនាទីសំខាន់ណាស់នៅក្នុងរាងកាយមនុស្ស ហើយរាងកាយមានផ្ទុកជាតិទឹកពី ៥៥-៧៨% ។ នៅក្នុងទឹក គ្មានជាតិស្ករ ជាតិកាបូន ឬកាឡូរីដែលធ្វើឲ្យប៉ះពាល់ដល់រាងកាយនោះទេ វាថែមទាំងអាចធ្វើឲ្យរាងកាយមាំមួន សុខភាពល្អ បើផឹកពី ៨-១០ កែវជារៀងរាល់ថ្ងៃ។ ទឹកជួយផ្តល់សំណើម ដែលអាចធ្វើឲ្យរាងកាយទាំងមូលដំណើរការបានល្អ។ ឥឡូវប្រិយមិត្តទៅមើលអត្ថប្រយោជន៍សំខាន់ៗទាំង ១០ របស់ទឹកទាំងអស់គ្នា៖
១. ទប់ស្កាត់ភាពអស់កម្លាំង
បើអ្នកផឹកទឹកតិចពេក អ្នកនឹងមានអារម្មណ៍ថាហត់នឿយអស់កម្លាំង ព្រោះកង្វះជាតិទឹកធ្វើឲ្យបេះដូងពិបាក ក្នុងការស្រូបយកអុកស៊ីហ្សែនពីចរន្តឈាម និងធ្វើឲ្យផ្នែកផ្សេងទៀតនៃរាងកាយដំណើរការមិនបានល្អ។ ដូច្នេះហើយបានជាធ្វើឲ្យអ្នកឆាប់ហត់។
២. ជំនួយខួរក្បាល និងអារម្មណ៍
ទឹកជួយធ្វើឲ្យអ្នកមានអារម្មណ៍ល្អ និងជំនួយដល់ការគិតរបស់អ្នកឲ្យកាន់តែប្រសើរឡើង
៣. ជួយកុំឲ្យឈឺក្បាល និងប្រកាំង
មូលហេតុដែលធ្វើឲ្យអ្នកឈឺក្បាលពេលខ្លះ គឺមកពីអ្នកផឹកទឹកមិនបានគ្រប់គ្រាន់។ បើអ្នកព្យាយាមផឹកឲ្យបានកាន់តែច្រើន វានឹងជួយធ្វើឲ្យការឈឺក្បាលធូរស្រាលជាងមុនច្រើន។
៤. ជួយសម្រួលដល់ការរំលាយអាហារ និងទល់លាមក
វាមានមុខងារជួយឲ្យក្រពះ ពោះវៀន ធ្វើការកិនរំលាយអាហារបានយ៉ាងល្អ ជួយសម្រួលដល់ការបន្ទោបង់មិនឲ្យទល់លាមក។
៥. ជួយសម្រកទម្ងន់
តាមការស្រាវជ្រាវរបស់អ្នកវិទ្យាសាស្ត្របានបង្ហាញថា ផឹកទឹកមួយកែវមុនញុំាំអាហារ អាចធ្វើឲ្យអ្នកមិនញ៉ាំហួសកម្រិត ថែមទាំងជួយដុតបំផ្លាញជាតិធាត់។ ជាពិសេសអ្នកដែលចង់សម្រកទម្ងន់ ផឹកទឹកប្រសើរជាងភេសជ្ជ:មានជាតិស្ករដទៃទៀត។
៦. ជួយកម្ចាត់ជាតិពុល
វាអាចកម្ចាត់ជាតិពុលតាមរយ: ការបែកញើសនិងទឹកនោមរបស់អ្នក។ ហើយទប់ស្កាត់កុំឲ្យកើតក្រួសក្នុងតម្រង់នោមថែមទៀតផង។
៧. គ្រប់គ្រងសីតុណ្ហភាពក្នុងរាងកាយ
ជាតិទឹកអាចបន្ថយកម្តៅដែលចេញតាមញើស ហើយធ្វើឲ្យអ្នកកាន់តែមានថាមពលខ្លាំងនៅពេលហាត់ប្រាណ។ វាក៏អាចជួយសន្លាក់ សាច់ដុំ មិនធ្វើឲ្យអ្នករងនូវ ការរមួលក្រពើនិងគ្រេចថ្លោះជាដើម។
៨. ជួយឲ្យស្បែកស្អាត
ជាតិសំណើមអាចជួយឲ្យស្បែកទន់ ភ្លឺរលោង ស្រស់ថ្លា និងក្មេងជាងវ័យ។
៩. សង្គ្រោះពេលអ្នកស្រវឹង ផឹកគ្រឿងស្រវឹងច្រើនធ្វើឲ្យអ្នកនោមញឹកញាប់ ហើយអ្នកនឹងបាត់បង់ជាតិទឹក ដូច្នោះបានជាអ្នកត្រូវផឹកទឹកឲ្យបានច្រើនមុនពេលចូលគេង នោះអ្នកនឹងមានអារម្មណ៍ស្វាងនៅពេលព្រឹក។
១០. ជួយឲ្យខ្យល់ដង្ហើមល្អ
ទឹកអាចជួយលាងសម្អាតអាហារ បាក់តេរីនៅក្នុងមាត់ និងកាកសំណល់នៅជាប់ធ្មេញដែលអាចបង្កជាក្លិនមិនល្អ។
ដូច្នេះទោះបីជាអ្នករវល់ជាមួយការសិក្សា ឬកិច្ចការងារផ្សេងៗយ៉ាងណាក៏ដោយ ត្រូវឆ្លៀតផឹកទឹកឲ្យបានយ៉ាងហោចណាស់ ២ លីត្រក្នុងមួយថ្ងៃ។
