បញ្ហាជ្រុះសក់គឺជារឿងថាំចិត្តមួយរបស់នារី ហើយការជ្រើសរើសសាប៊ូដើម្បីទប់ស្កាត់ការជ្រុះ និងបណ្ដុះសក់ឡើងវិញ ក៏ជារឿងស្មុគស្មាញដែរ ដោយសារសាប៊ូកាន់តែច្រើនត្រូវបានផ្សព្វផ្សាយថាមានប្រសិទ្ធភាព តែក្រោយពេលប្រើ បែរជាមិនដូចការឃោសនាទៅវិញ។
គ្រឿងផ្សំគឺជារបស់សំខាន់ដើម្បីដឹងថាសាប៊ូនោះមានសារជាតិជំនួយដល់ការងារបណ្ដុះសក់ និងបញ្ឈប់បញ្ហាដែលអ្នកកំពុងជួបប្រទះឬអត់? ដូច្នេះពេលទិញសាប៊ូកក់សក់ សូមពិនិត្យមើលធាតុផ្សំណាមួយក្នុងចំណោមខាងក្រោមនេះ នោះអ្នកនឹងទទួលបានលទ្ធផលគាប់ចិត្ត ដូចអ្វីដែលគេផ្សព្វផ្សាយមែន។
១- Minoxidil
វាជាសារធាតុគីមី (C9H15N5O ) ដែលដើរតួសំខាន់ជាធាតុផ្សំក្នុងសាប៊ូកក់សក់ជួយប្រឆាំងការជ្រុះសក់ឬរោម ជំនួយសក់ឱ្យកាន់តែវែង ក្រាស់ និងរឹងមាំ។ ជាទូទៅ សារធាតុ Minoxidil នេះអាចមានប្រសិទ្ធភាពដល់ទៅ៩៥%ឯណោះ។ សារធាតុនេះមិនមែនត្រូវបានប្រើក្នុងសាប៊ូកក់សក់តែមួយមុខនោះទេ អ្នកអាចឃើញមានគេប្រើនៅក្នុងប្រេងធម្មជាតិជាច្រើនដើម្បីម៉ាស្សាស្បែកក្បាល បង្កើនលទ្ធភាពឱ្យសក់ដុះលឿន និងមានឫសកែវរឹងមាំ។
២-ធាតុផ្សំពីប្រេងផ្កាឡាវេនឌើ
ប្រេងផ្កាឡាវេនឌើមិនត្រឹមតែអាចឱ្យអ្នករំសាយអារម្មណ៍តានតឹងក្រោយធ្វើការស្ត្រេសជាច្រើនម៉ោងនោះទេ តែវាអាចជួយក្នុងការព្យាបាលការជ្រុះសក់បានយ៉ាងល្អទៀតផង។ វាដើរតួនាទីជាអ្នកលាងសម្អាតស្បែកក្បាល ធ្វើឱ្យសក់ដែលខូចមានសភាពរឹងមាំឡើងវិញ។ ក្រៅពីមាននៅក្នុងសាប៊ូកក់សក់ ផ្កាឡាវេនឌើក៏ត្រូវបានគេចម្រាញ់បន្ថែមនៅក្នុងផលិតផលសម្រាប់សក់ជ្រុះជាច្រើន ថ្នាំបន្ទន់សក់ និងវិធីធម្មជាតិដើម្បីធ្វើឱ្យសក់រឹងមាំទៀតផង។
៣-ប្រទាលកន្ទុយក្រពើ
ប្រទាលកន្ទុយក្រពើមានផ្ទុកសារធាតុរ៉ែ វីតាមីន អាមីណូអាស៊ីត និងស្កររាប់រយមុខ។ វាមិនត្រឹមតែត្រូវបានគេប្រើសម្រាប់ថែរក្សាស្បែកសម្រាប់នារីប៉ុណ្ណោះទេ តែមានប្រសិទ្ធភាពក្នុងការការពារសក់ជ្រុះ ធ្វើឱ្យសក់កាន់តែទន់ល្មើយ ក្រាស់និងរឹងមាំ។ វាធ្វើការជាអ្នកសម្អាតស្បែកក្បាល បណ្ដុះកោសិកាដែលងាប់ៗឱ្យរស់ឡើងវិញ បើកផ្លូវឱ្យសារធាតុបំប៉នទាំងឡាយអាចជ្រៀតចូលទៅដល់ស្បែកខាងក្នុង ទប់ស្កាត់ការរលាកជាដើម។
៤-Cellium
វាត្រូវបានចម្រាញ់ចេញពីរុក្ខជាតិសុទ្ធសាធ ហើយមានតួនាទី៣សំខាន់ៗ គឺ ប្រឆាំងការកើតមានកោសិកាងាប់ ប្រឆាំងការរលាកស្បែកក្បាល និងបង្កើនបរិមាណជាតិខូឡាជិន។ យោងតាមការសិក្សាស្រាវជ្រាវផ្នែកវេជ្ជសាស្ត្រជាច្រើនបានរកឃើញថា Celliumអាចជួយកាត់បន្ថយការជ្រុះសក់ បង្កើនការលូតលាស់នៃខូឡាជិនដែលនៅជុំវិញរន្ធដែលសក់ដុះចេញមក និងជំនួយការសក់ដែលដុះមកថ្មី។
៥-Biotin
វាត្រូវបានគេស្គាល់ថាជា វីតាមីន B ឬវីតាមីន H។ Biotinដើរតួនាទីសំខាន់ក្នុងការលូតលាស់របស់រាងកាយ។ កង្វះជាតិ Biotin នេះនឹងធ្វើឱ្យរាងកាយមនុស្សជួបប្រទះបញ្ហាមួយចំនួនដូចជា ជ្រុះសក់ ស្បែកស្លេកស្លាំង ក្រហមនៅជុំវិញភ្នែក ច្រមុះ មាត់ និងដៃជើងជាដើម។ អត្ថប្រយោជន៍នៃ Biotin ដែលគេប្រើក្នុងសាប៊ូកក់សក់គឺ ជួយឱ្យសក់កាន់តែរឹងមាំ បន្ថែមភាពយឺតនៃសរសៃសក់ មិនឆាប់ផុយស្រួយ និងការពារការបែកចុង។
ក្រៅពីធាតុផ្សំសំខាន់ទាំង៥ដូចបានរៀបរាប់ខាងលើ សាប៊ូសម្រាប់អ្នកជ្រុះសក់ក៏មានធាតុចាំបាច់មួយចំនួនទៀតដូចជា Keratin (ប្រភេទប្រូតេអ៊ីន) វីតាមីន E ប្រេងចម្រាញ់ពីផ្លែក្រូចថ្លុង ប្រេងផ្លែ Jojoba ប្រេងចម្រាញ់ពីគ្រាប់អាល់មុនជាដើម សុទ្ធតែអាចមានសុវត្ថិភាពក្នុងការប្រើប្រាស់ និងទប់ស្កាត់បញ្ហាសក់ដែលកំពុងជួបប្រទះបាន៕
