ក្នុងសង្គមខ្មែរយើង ក៏ដូចជាប្រទេសប៉ែកអាស៊ីមួយចំនួន មានវប្បធម៌ស្រដៀងគ្នាមិនថាជំនាន់ដើម ឬសម័យបច្ចុប្បន្នទេ ដោយគេតែងតែឲ្យតម្លៃ និងលើកតម្កើងមនុស្សស្រីដែលចេះថែរក្សាភាពបរិសុទ្ធរបស់ខ្លួនរហូតដល់ថ្ងៃរៀបការ។ ទោះសម័យបច្ចុប្បន្នមានការបើកទូលាយនូវចំណេះដឹងផ្លូវភេទ ក៏ប្រជាជនភាគច្រើននៅប្រកាន់យកផ្នត់គំនិតអៀនខ្មាស និងមិននិយាយបើកចំហពីបញ្ហានេះ។ ដោយសារតែដូច្នេះហើយទើបមានអ្នកខ្លះនៅតែជឿលើការនិយាយតគ្នា ពីរឿងពាក់ព័ន្ធនឹងការមើលព្រហ្មចារី ហើយធ្វើការកាត់ក្ដីដោយយល់ខុសថានារីនោះបរិសុទ្ធ ឬអត់ ធ្វើឲ្យមនុស្សស្រីអាប់ឱននិងរងការចោទប្រកាន់។ របៀបមើលភាពបរិសុទ្ធទាំង ៤ យ៉ាងនេះដែលសុទ្ធតែមិនត្រឹមត្រូវ និងចេះតែនិយាយតគ្នា៖
១. បើក្រមុំនឹងហូរឈាមច្រើនពេលរួមដំណេកលើកដំបូង
មិនប្រាកដថាគ្រប់មនុស្សស្រីព្រហ្មចារីទាំងអស់នឹងមានឈាមហូរច្រើនពេលរួមដំណេកលើកដំបូងនោះទេ។ មនុស្សស្រីគ្រប់គ្នាកើតមកមានសន្ទះព្រហ្មចារី និងរន្ធប្រដាប់ភេទខុសៗគ្នា ខ្លះក្រាស់ ខ្លះទៀតស្ដើង ហើយករណីខ្លះទៀតនាងកើតមកគ្មានសន្ទះនោះតែម្ដង ដែលធ្វើឲ្យហូរឈាមតិចច្រើន ឬគ្មានឈាមហូរក៏មាន។
២. លើកទីមួយគឺឈឺខ្លាំង
វាអាចមានអាការឈឺ តែមិនដល់ថ្នាក់ឈឺទ្រាំមិនបាននោះទេ។ ដោយសារទំហំនិងកម្រាស់សន្ទះព្រហ្មចារី ទើបមានអ្នកខ្លះឈឺតិច ឬអត់ឈឺ ដូច្នេះមិនអាចកាត់ក្ដីថានាងមិនបរិសុទ្ធនោះទេ។
៣. ក្រមុំព្រហ្មចារីត្រូវតែមានទ្វាមាសតឹងណែន
មិនមែនមនុស្សស្រីក្រមុំទាំងអស់ត្រូវតែមានរន្ធទ្វាមាសតឹងណែននោះទេ ព្រោះប្រដាប់ភេទមនុស្សស្រីមានទម្រង់ផ្សេងៗពីគ្នាដែលមិនអាចកំណត់បានថា ទាល់តែតឹងណែនទើបបរិសុទ្ធនោះទេ។
៤.នាងអស់ព្រហ្មចារីជាមួយសង្សារចាស់
មិនមែនឲ្យតែបាត់បង់ព្រហ្មចារី គឺសុទ្ធតែជាមួយប្រុសដទៃនោះទេ អ្នកប្រហែលជាគិតរំលងពីការជួយខ្លួនឯង។ ការមានចំណង់ផ្លូវភេទជារឿងធម្មជាតិ ហើយការសម្រេចចំណង់នោះខ្លួនឯងគឺតែងកើតមានឡើង ដែលធ្វើឲ្យដាចសន្ទះព្រហ្មចារី៕
