រមាស់ស្បែកពោះអំឡុងពេលមានផ្ទៃពោះ គឺជាបញ្ហាមួយដែលមនុស្សស្រីជួបប្រទះ ហើយការរមាស់បែបនេះ កាលណាយើងអេះវាយូរទៅ បណ្ដាលឱ្យចេញសង្វារ។ ដឹងស្រាប់ហើយថាសង្វារនេះគឺជាសត្រូវជាមួយមនុស្សស្រី ព្រោះវាធ្វើឲ្យមនុស្សបាត់បង់ជំនឿចិត្តលើរូបរាងខ្លួនឯង។ ដើម្បីកម្ចាត់ការរមាស់ស្បែកពោះនេះ កញ្ញា មានវិធីសាស្ត្រ ៥យ៉ាងដែលនារីអាចសាកល្បងបាន ៖
១. ប្រទាលកន្ទុយក្រពើ
ប្រទាលកន្ទុយក្រពើមានជាតិសំណើមដែលអាចប្រឆាំងនឹងមេរោគរមាស់ស្បែកពោះនេះបាន។ លាបសាច់ប្រទាលកន្ទុយក្រពើស្រស់ៗទៅលើស្បែកពោះទុក ១០ ទៅ២០នាទីសឹមលាងចេញ ដើម្បីបន្ថយការរមាស់ និងស្បែកឆាប់ប្រតិកម្ម។ វាមានសុវត្ថិភាពសម្រាប់ការប្រើក្នុងអំឡុងពេលមានផ្ទៃពោះ ដោយមិនបាច់បារម្ភថាវាមានផលប៉ះពាល់នោះទេ។ ធ្វើបែបនេះ១អាទិត្យ ២ដង។
២. ម្សៅសូដា
ម្សៅសូដាអាចជួយឲ្យអ្នកមានផ្ទៃពោះធូរស្បើយភ្លាមៗពីការរមាស់និងក្រហម។ វាជួយសម្អាតស្បែក និងកម្ចាត់សារជាតិពុលចេញពីស្បែកដែលអាចឲ្យស្បែកមានសុខភាពល្អ។ លាយ ២ទៅ៣ ស្លាបព្រាកាហ្វេនៃម្សៅសូដាជាមួយទឹកកូរឲ្យខាប់ល្មម បន្ទាប់មក លាបនៅលើកន្លែងដែលរមាស់ខ្លាំង ទុកចោល ១៥ ទៅ២០នាទីសឹមលាងទឹកចេញ។
៣. យ៉ាអួ
យ៉ាអួគឺជាគ្រឿងផ្សំដ៏ពេញនិយមបំផុតសម្រាប់កម្ចាត់ការឆ្លងមេរោគផ្សិតដែលបណ្តាលឱ្យរមាស់នៅជុំវិញស្បែកពោះ ឬប្រដាប់បន្តពូជ។ យ៉ាអួមិនត្រឹមតែធ្វើឲ្យស្បែករបស់អ្នកត្រជាក់ប៉ុណ្ណោះទេ តែវាធ្វើឱ្យស្បែកស្រស់ថ្លា មានសំណើមបំបាត់ការរមាស់ ការរលាក។
៤. ប្រេងដូង
ប្រេងដូងគឺជាគ្រឿងថែរក្សាស្បែកដ៏ល្អសម្រាប់ស្បែកស្ងួតនិងបញ្ហាស្បែករមាស់។ ការខ្វះជាតិទឹកគឺជារឿងធម្មតាក្នុងអំឡុងពេលមានផ្ទៃពោះហើយវាអាចបណ្តាលឲ្យស្បែករមាស់។ ការលាបមិនត្រឹមតែផ្ដល់សំណើមនោះទេ វាក៏ជាភ្នាក់ងារអង់ទីប៊ីយ៉ូទិកដ៏មានប្រសិទ្ធភាពដែលជួយសំអាតការឆ្លងមេរោគបាក់តេរីឬផ្សិតនៅលើស្បែកផងដែរ។
៥. ទឹកក្រូចឆ្មារ
ទឹកក្រូចគឺសំបូរវីតាមីន C និងត្រូវបានគេដឹងថាវាមានអត្ថប្រយោជន៍ស្បែកយ៉ាងប្រសើរ។ វាមិនត្រឹមតែផ្តល់ឱ្យអ្នកនូវស្បែកដ៏ល្អប៉ុណ្ណោះទេ ប៉ុន្តែក៏ជួយបំបាត់ការរមាស់ផងដែរ។ ទឹកក្រូចគឺមានជាតិអាស៊ីតធម្មជាតិ ដែលអាចធ្វើអោយស្បែកឆាប់ប្រតិកម្មដូច្នេះ នៅពេលអ្នកចង់ប្រើទឹកក្រូចឆ្មារ នៅលើស្បែកអ្នកត្រូវលាយវាជាមួយទឹកហើយប្រើវាតិចតួចបានហើយ៕
