ពេលពេញវ័យ គឺជាពេលមួយដែលរូបរាងកាយនារីមានការប្រែប្រួលច្រើន។ លើសពីនេះទៅទៀតចំណុចសំខាន់លើខ្លួន គឺសុដន់តែម្ដងក៏មានភាពប្រែប្រួលខ្លាំងណាស់ដែរ នៅក្នុងអំឡុងពេលវិវត្តន៍នេះ។ ខាងក្រោមនេះជារឿងដែលនឹកស្មានមិនដល់ពីការផ្លាស់ប្ដូរនៃដើមទ្រូង៖
១.ទំហំប្រែប្រួល
ពេលពេញវ័យ រូបរាងកាយមនុស្សស្រីក៏ចាប់ផ្ដើមប្រែប្រួល ដូចនេះហើយទើបទំហំសុដន់ផ្លាស់ប្ដូរទៅជាធំ ដោយសារ ទម្ងន់ សមាសភាពសាច់ដុំ ការប្រើប្រាស់ថ្នាំផ្សេងៗ និងវ័យ។ ពេលខ្លះទៀតការវិវឌ្ឍនៃជាលិកាអាចធ្វើឲ្យទំហំសុដន់ប្រែប្រួលដោយខ្លួនឯងបាន នៅពេលដែលអ្នកមានវ័យកាន់តែច្រើន ដូច្នេះហើយស្រីៗត្រូវតែទៅទិញអាវទ្រនាប់ថ្មីងាយស្រួលពាក់។
២.មានទឹក
អ្នកច្បាស់ជាមានការភ្ញាក់ផ្អើល បើសិនជាថ្ងៃណាមួយអ្នកសម្លឹងចុះក្រោម ហើយឃើញមានចេញទឹកពីក្បាលសុដន់។ ទឹកនោះចេញមកមានពណ៌ខុសៗគ្នា ពេលខ្លះមានពណ៌រៀងលឿងខ្លាំង ហើយអាចជាពណ៌ បៃតង ឬក្រហម។ ទឹកចេញពីក្បាលសុដន់បែបនោះ ជារឿងធម្មតា ឬអាចមានបញ្ហាមិនប្រក្រតី។ ដោយសារការប្រឹងត្រដុសចុងសុដន់ ឬការហាត់ប្រាណ ហើយទឹកនោះក៏អាចបង្កជាមេរោគឆ្លងបានទៀតផង។ ក្នុងរយៈពេលយូរអ្នកនៅតែមានបញ្ហានេះទៀតវាអាច ប៉ះពាល់ដល់ការបំបៅដោះកូន ហើយពេលខ្លះក៏អាចបង្កជាជំងឺមហារីក។ តែបើវាជារឿងធម្មតានឹងបាត់ទៅវិញដោយខ្លួនឯងក្នុងរយៈពេលខ្លី ប៉ុន្តែយល់ល្អអ្នកគួរតែទៅជួបវេជ្ជបណ្ឌិត ដើម្បីពិនិត្យរកមើលមូលហេតុឲ្យបានច្បាស់លាស់។
៣.ចុងសុដន់អាចប្រែប្រួលរូបរាង ឬទំហំ
ចុងសុដន់អាចប្រែប្រួលរូបរាង ឬទំហំនៅពេលដែលស្ត្រីមានផ្ទៃពោះ និងបំបៅដោះកូន។ កម្រណាស់ដែលនៅសុខៗវាទៅជាប្រែប្រួលរូបរាងដោយខ្លួនឯងនោះ។ បើសិនជាចុងសុដន់លឹបចូលក្នុង ឬមួយចេញមកក្រៅខុសធម្មតា ឬមានការប្រែប្រួលតែម្ខាងក៏ដោយ អ្នកគួរតែទៅពិនិត្យឲ្យ បានត្រឹមត្រូវ ព្រោះវាអាចជាសញ្ញាគ្រោះថ្នាក់ ដូចជាមហារីកដោះជាដើម។
៤. អាចមានដុំនៅក្នុងសុដន់
ពេលឮពាក្យថាដុំ អ្នកច្បាស់ជាគិតពីមហារីកហើយត្រូវទេ? វេជ្ជបណ្ឌិតជំនាញបានរៀបរាប់ថាដុំដែលកើតនៅក្នុងដោះវាជារឿងធម្មតាពេលដែលមនុស្សស្រីមានអាយុចាប់ពី ២០ ឆ្នាំឡើងទៅ។ វាបណ្ដាលមកពីបម្រែបម្រួលអ័រម៉ូន សរសៃហ្វាយបឺរ (fibrocystic) ប៉ុណ្ណោះ។ ប៉ុន្តែដុំមហារីកនៅតែជាអាទិភាពមួយ ដែលនោះហើយជាមូលហេតុតម្រូវឲ្យមានការពិនិត្យសុដន់ដោយខ្លួនឯងប្រហែលម្តងក្នុងមួយខែ។ ប្រសិនបើអ្នកមានអារម្មណ៍ឈឺចាប់ ឬដុំនោះធ្វើទុក្ខអ្វីមួយ គួរប្រញាប់ណាត់ជួបជាមួយគ្រូពេទ្យដើម្បីពិនិត្យ។
៥.មានដុះរោមនៅលើសុដន់
រោមអាចដុះបានស្ទើរតែគ្រប់ផ្នែកទាំងអស់នៅលើរាងកាយ ហើយវាក៏ជារឿងធម្មតា នៅពេលឃើញមានរោមដុះ ២-៣ សរសៃនៅលើសុដន់។ អ្នកមិនចាំបាច់ព្រួយបារម្ភទេ វាគ្មានអីចម្លែកនោះឡើយ បើសិនជាអ្នកចង់បកវាចេញក៏បានដែរ។
៦.យារធ្លាក់
នេះមិនមែនមកពីការឡើងទម្ងន់ទេ សុដន់មានផ្ទុកនូវក្រពេញទឹកដោះ ជាតិខ្លាញ់ និងជាតិខូឡាជេន។ ពេលដែលអ្នកមានអាយុកាន់តែច្រើន ក្រពេញ និងជាតិខូឡាជេនរូមតូចជាងមុន ហើយជំនួសដោយជាតិខ្លាញ់វិញ។ ទាំងអស់នេះក៏ជាហេតុដែលបណ្ដាលឲ្យសុដន់មានការយារធ្លាក់។
៧.ស្ងួតជាងមុន
តើអ្នកមានដឹងទេថា សុដន់ងាយរងនូវភាពស្ងួតដូចជាស្បែកខ្លួន និងផ្ទៃមុខដែរទេ? ស្បែកសុដន់គឺស្ដើងណាស់ អាចរងនូវភាពស្ងួតជាងកន្លែងដទៃនៃរាងកាយទៅទៀត។ ប្រសិនបើអ្នកជួបប្រទះបញ្ហាទាំងអស់នេះ ក៏មិនបាច់ភ្ញាក់ផ្អើល អ្នកគួរតែប្ដូរមកប្រើសាប៊ូណាដែលផ្ដល់សំណើមដល់ស្បែក ហើយកុំងូតទឹកក្ដៅច្រើនពេក ព្រោះវាអាចយកជាតិសំណើមចេញពីស្បែកអ្នកបាន៕
